«Հեքիաթֆիլմի» 5 ամյակ

    2014թ. Հոկտեմբերի 23-ին լրացավ Նարինե Մնացականյանի հեղինակային «Հեքիաթֆիլմ» նախագծի ստեղծման 5 ամյակը: Այս հինգ տարիների ընթացքում  «Հեքիաթֆիլմ»-ը նկարահանել է  2 գեղարվեստական ֆիլմ և 7 տեսահոլովակ, ստեղծել և ձայնագրել է 7 երգ: «Հեքիաթֆիլմ» -ը  5 տարիների ընթացքում կինոարվեստի հմտություններով կիսվել և նկարահանել է շուրջ 300 երեխայի: «Հեքիաթֆիլմ»-ն ունի իր հիմնը, կայքը և տարբերանշանը: «Հեքիաթֆիլմ»-ի հինգ ամյակի առիթով զրուցեցի Նարինե Մնացականյանի հետ:

   – Նախ շնորհավորում եմ «Հեքիաթֆիլմ» -ի 5 ամյակի առիթով և ուղղում Ձեզ առաջին հարցս.Չէ որ դուք արդեն ունեիք նկարահանած ֆիլմեր,ինչը ձեզ դրդեց, ստեղծել «Հեքիաթֆիլմ»-ը:
 -Շնորհակալություն շնորհավորանքի համար:Մարդիկ որքան ավելի հասուն են դառնում, այնքան ավելի լավ են հասկանում, թե որն է իրականում իրենց կյանքի ճանապարհը և ինչի համար են իրենք ծնված: 2009 թվականն ինձ համար եղավ ճակատագրական, ես վերջնականապես իմի բերեցի իմ պատկերացումներն ու ցանկությունները: Հասկացա, որ սիրում եմ այն ամենն, ինչը կապված է երեխաների հետ: Հասկացա նաև, որ չեմ պատկերացնում ինձ առանց կինոարվեստի  և երգարվեստի: Երեխաներ, կինո և երաժշտություն միաձուլումից ծնվեց «Հեքիաթֆիլմ»-ը և դարձավ իմ կյանքի ճանապարհը:
          «Հեքիաթֆիլմ»-ը փաստացի դարձավ իրականություն 2009թ. հոկտեմբերի 23-ին «Հայհեղինակ» հասարակական կաղմակերպությունում գրանցվելով, որպես մանկապատանեկան ֆիլմեր ստեղծող հեղինակային նախագիծ:

 – Ի՞նչ նպատակ են հետապնդում «Հեքիաթֆիլմ»-ի տեսահոլովակներն ու ֆիլմերը:
 – Երեխաները, նրանց ներկան ու ապագան, նրանց մարդկային տեսակի ձևավորումը, իմ մտահոգություններն են:Բաղձանքս երկիր մոլորակի ապագա կյանքի խաղաղությունն է:Իսկ դրականին ու ճշմարիտին հասնելու համար մարդիկ պետք է ճիշտ ինֆորմացիա ստանան հոգեբանական տեսանկյունից ամենաընկալունակ տարիքում:Բոլոր տեսակի ինֆորմացիաների կողքին երեխաներն արդեն ունեն «Հեքիաթֆիլմ», որն ընձեռում է ոչ միայն հաճելի ու անվտանգ ժամանց, այլ նաև հնարավորություն է տալիս մտածել կյանքում լավ մարդ լինելու մասին:

 – Արդյոք հե՞շտ  է աշխատել երեխաների հետ:
 – Երեխաները խիստ տարբեր անհատականություններ են, և եթե մոտեցումն անհատական չլինի, ավելի հաճախ կխճճվես բնավորությունների ու վարքագծերի հորձանուտում:Անհատական մոտեցումից բացի, երեխաների հետ աշխատանք կատարող մարդը նախևառաջ պետք է օժտված լինի ներել կարողանալու մեծ ուժով:Նույնիսկ ամենաբարդ բնավորություն ունեցող երեխայի հետ հնարավոր է հասնել հաջողությունների, եթե նա զգա, որ իրեն սիրում են: Իմ սերը երեխաների նկատմամբ սահմաններ չունի և հենց այդ սերն էլ բացում է բոլոր խոչընդոտների դռներն ու դժվարին աշխատանքը դարձնում հաճելի և սիրելի: – Գաղտնիք չէ, որ մեր ժամանակներում այդքան էլ հեշտ չէ ֆիլմ նկարահանելը: Ինչպե՞ս է դա Ձեզ հաջողվում: Հովանավորներ ունե՞ք:
 – Երբ հավատում ես քո որոշմանն ու  նպատակին, տիեզերքի կողմից մի մեծ ուժ սկսում է օգնել քեզ: Իմ կյանքում մեկ անգամ չէ, որ հրաշքներ են տեղի ունեցել և ես արդեն մանկան նման հավատում եմ հրաշքներին:Անշուշտ համառությունն ու չկոտրվելու ունակությունն են, որ մարդուն թևեր են տալիս ու դարձնում նպատակասլաց:Երբեմն սկսում ես գնահատել կյանքի այն անհաջողությունները, որոնք քեզ ավելի ու ավելի ուժեղ են դարձնում: Նախևառաջ ես շնորհակալ եմ Աստծուց, որ ճանապարհիս  հաճախ են հանդիպում այնպիսի մարդիկ ,ովքեր հավատում, գնահատում ու օգնության են հասնում կարևոր պահերին:
          Որքան էլ անհավանական կթվա, բայց մենք այս 5 տարին աշխատել ենք առանց հովանավորի: Շնորհակալ եմ բոլոր այն հարազատներից, ընկերներից ու աջակիցներից, ովքեր օգնության ձեռք են մեկնել «Հեքիաթֆիլմ»-ին և մենակ չեն թողել ինձ՝ դժվարություններով լեցուն ճանապարհներին:

 -Ի՞նչ պլաններ ունեք «Հեքիաթֆիլմ»-ի ապագա աշխատանքների հետ կապված:
 
-Ծրագրերի մասին պատմել՝ նշանակում է տալ խոստում և անցկացնել անքուն գիշերներ: Թող անակնկալ մնա:

 

 

Հարցազրույցը վարեց՝ Գայանե Մնացականյանը